പട്ടാഭിഷേകം

നവ ശൂര്‍പ്പണഖമാരെ ശ്രദ്ധിക്കുക
നിങ്ങളുടെ പൂര്‍വികയുടെ
മൂക്കും മുലയും കാതും മുടിയുമരിഞ്ഞ
ശരം കുഴിച്ചെടുത്തിട്ടുണ്ട്‌ മംഗ്ലൂരില്‍
കാടിളകി വരുന്നുണ്ട്‌ ശ്രീരാമ സേന
അല്ലെങ്കില്‍ തന്നെ
യൂറോപ്യന്‍ വസ്ത്രങ്ങളില്‍ കുത്തി നിറച്ച്‌
നിങ്ങളുടെ ശരീരമെന്തിനിങ്ങനെ വിളംബരം ചെയ്യണം
കണ്ടു പടിക്കുക പ്രഗ്യാസിങ്ങിനെ, ഉമാഭാരതിയെ
ആര്‍ഷ ഭാരത വസ്ത്രശാല തുറന്നിട്ടുണ്ട്‌
രാമജന്മ ഭൂമിയില്‍
എന്നിട്ട്‌ പുറപ്പെടുക
സേതു മുറിക്കേണ്ടതില്ല
മീന്‍കൊത്തിച്ചാത്തന്റെ വായു മാര്‍ഗത്തില്‍
അവിടെ നവ ലങ്ക എരിയുന്നുണ്ട്‌
കുറെച്ചെണ്ണ കരുതുക (വിലക്കുറവാണല്ലൊ)
നമുക്ക്‌ പൂര്‍ത്തീകരിക്കാം ലങ്കാദഹനം